لبعض قيادتنا السياسية بالمؤتمر وتحديدا العفاشية من نكن لها كل التقدير والوفاء واكرر بعض قيادتنا السياسية وليس من حددت موقفها من الحوثي سواء كانت سياسية بالموقف او عسكرية بالرصاصة والبندقيه وحددت معركتها ووجهتها. وبعد.
نعلم ان لديكم ثأر مع الاصلاح على خلفية ماحدث العام 2011 ولهذا لاسيطرة الحوثي ولا تبعية اليمن لإيران او حتى للشيطان الرجيم تعنيكم وكلما يعنيكم وتصبون عليه جل اهتمامهم وتعتبرونها معركتكم هو حزب الاصلاح وسيطرة حزب الاصلاح ونحن كذالك مثلكم انا وامثالي ملايين العفافييش وملايين اليمنيين مابنسمح لهم يسيطروا لكنّا حاليا لا نعتبرهم عدونا ولايتصدروا قائمة معركتنا بل يتصدر معركتنا ومعركتهم عدواً واحد هو الحوثي ولاسواه وربما قد يكون هذا سبب ان لانصيب لنا نحن من اولوية معركتهم الحوثي لا بمحبتكم ولا كراماتكم. بإختصار..
اسمعوا ياجماعه فرق بيننا وبينكم لان احنا اولاً مشردين ونشتي نرجع بيوتنا على عكسكم انتوا معاكم بكل دوله سفنتاعشر الف بيت..
ثانياً.. معاكم فلوس زي الرز تقدرو تعيشوا بالخارج قرون مش بس عقود ومبسوطين احنا مشنطحين حالتنا حاله لهذا طبيعي تكون قضيتنا ومعركتنا الحوثي اللي شردنا بينما معركتكم تصفية حسابات شخصيه و خاصه.
ثالثاً.. انتو عيالكم بيدرسوا بجامعات امريكي وفرنساوي وجامعات اوروبيه وعربيه لهذا مش خايفين عليهم وعلى فكرهم وعقيدتهم ولا مستقبلهم بس احنا مافيش معانا الا المدارس الحكومية والمدرسين خريجين معهد الشوكاني وكلية التربيه والمعاهد يدرسوا لنا عيالنا لهذا صعب نتقبل سيطرة الحوثي وفكره وملازمه وعقيدته ومشروعه خوف ان احنا نصحى يوم ونلاقي عيالنا قد هم عاملين تماثيل لعبدالملك الحوثي واخوه حسين وخامنئي وحسن نصر الله وجالسين يسجدوا لها ويعبدوها ساع هبل وعبداللات والعزى مانود قوله لكم على ان تركيز معركتنا نحو الحوثي وتجنب الاصلاح او غيره من الاطراف اللي بتواجهه حاليا مش معناها ان قد خلعنا جلد العفششه ودخلنا جلد اخوان حسن البناء معناها ان احنا قررنا نكون احنا وكل من يقاتل الحوثي اخوان داخل مترس ضد عدوا يستهدفنا جميعا وطالما بندقهم ومترسهم ووجهتهم وكلمتهم نحو عدونا هذا اذا بندقنا ومترسنا ووجهتنا وكلمتنا موجهه لنفس العدوا ومتى شفناهم حرفوا وجهتهم نحونا وقتها لنا خبر.. ولهذا بحق عفاشيتنا التي قد تتفوق على عفاشيتكم نفسها لان عفاشيتكم لمناصبكم وسلطتكم واحنا عفاشيتنا برضوا لسلطتكم ومناصبكم عفاشية وفاء ومحبه صادقه لوجه الله دون مقابل ومن 25 سنه و من قبل 2011 وبعده لما كنتوا تخوضوا معركه حقيقيه وخذلكم الأبعد وفر منكم الأقرب بينما وقفنا صامدين من وقتها ولليوم وسوف تبقى و اين مايممتوا وجوهكم يممنا ودون مقابل ودفعنا ومازلنا ندفع الثمن غالي وما طلبنا منكم جزاء ولا شكورا اما الان اطمئنكم انه عيوقف معكم وجنبكم الطارف حتى من كانوا اعدائكم خصوص انكم الان بتصرفوا بيس والوضع اصبح بيع وشراء لدى كل الاطراف وسباق مزادات شغال حريقه شراء واستقطاب كل طرف لمعركته فما بالكم انتوا اللي بتشتروا ومافيش لديكم معركه حقيقيه اصلاً. عموما..
الله يحفظكم ويشلنا، ويغنيكم ويفقرنا، ويحييكم ويموتنا، على قولة عادل امام لديكم حلين لاثالث لهم اما واحترمتوا مشاعرنا ولا تسترخصوا تضحيات الرجال التي تقاتل اين كان انتمائها ولا تهينوا معركة اليمنيين المقدسة وقضيتهم حتى وان كانت اخفاقاتها اكثر من انتصاراتها احترموا الشعر الشائب لشيوخ ومسنين مارب الذي يرابطون بالمتارس منذ اشهر وقد بلغ بعضهم من العمر عتيا ولا توزعوا صكوك العفششه والوطنيه بمزاجيات كفايه توزعوا على حسب مزاجياتكم الفلوس والاعتمادات بس العفششه والانتماء العفاشي والوفاء الصادق لايمكن نقبل ولا يمكن نسمح لكم لان هذا الصك بالذات لايوزع حسب التغريدات وشتم الاصلاح وعلي محسن بل لمواقف 11 سنه فكيف بمواقف خمسه وعشرين او ثلاثين عام فإما تكونوا يد خير لتوحيد الصفوف ضد الحوثي وتكونوا ولو لمره واحده بحياتكم قريبين من قواعدكم ووطنكم او تكفونا احقادكم وخرابكم اقلها فترة قتال اليمنيين للحوثي وان انتصرنا على الحوثي فنصرنا نصركم وان فشلنا وخسرت قضيتنا قد احنا من جيز شعب بكامله مدبر ابن مدبر ومصيرنا من مصيرهم وانتوا عيشوا وادغزوها ريشه واموركم مضبطه تمام وماخسرتو شي خصوص انكم ما كنتوا لا مع دول ولا مع دول او لديكم الحل الثاني وهو انكم تصرفوا لنا اكثر من خمسه مليون مؤتمري اعتمادات وشقق بالقاهره والاردن وسجلوا عيالنا يدرسوا جنب عيالكم فرنساوي وطلياني واسباني والماني وتجيبوا لنا اقامات وامتيازات وابشروا الا نسمع بحزب الاصلاح امة لااله الا الله ونخليه عبره لمن لايعتبر ولا عاد نذكر الحوثي وقد احنا هولاء البياعين وجيزنا من جيز اللي بيطلبوا الله ومسجلين براس قائمة الوطنيين وحتى يحكم الحوثي الف سنه ومادام رب البيت بالدف ضارب فشيمة اهل البيت كلهم الرقصِ وانا رب ابلي ولليمن ربٌ يحميها اما هذا او بجاه الله وجاه زعيمنا خلونا نقاتل ونوقف احنا وكل من هو ضد الحوثي صف ومترس من شان نرجع بيوتنا من شان الملايين اللي بمناطق سيطرة الحوثي وبيدفعوا دم نصفهم مش لاقيين ايش ياكلوا هانهم الحوثي والله العظيم ان معظمهم كانوا ومازالوا أوفياء لكم ووقفوا وضحوا على شانكم خلونا نوحد صفوفنا ان شاء الله نوحدها مع الشياطين الزرقاء اذا هم عيقاتلوا الحوثي مش بس احنا والاصلاحيين اللي معظم اعضائه حالة امهم حاله ادبرهم الله مثلنا بشويه برجوازيين مثلكم معاهم بيس و جالسين بالخارج وكل معركتهم و قضيتهم ومعركتهم ان العفافييش ما يعيشوا خالص على وجه الارض مش بس باليمن مشكلتهم طارق ومشكلتهم احمد ومشكلتهم العفاففييش بينما الحوثي شيء ثانوي ومافيش مشكله عندهم حتى لو يسيطر على كل اليمن تشاهدهم كالملذوع بلدغة الثعبان بكتاباتهم وتغريداتهم كلما شاهدوا او سمعوا دعوات لتوحيد الصفوف ضد الحوثي لا معركتهم اليمن ولا قضيتهم وطن.. ولهذا ايش رايكم نجمعكم انتوا وهم لجزيره او اي منطقه او صحراء لوحدكم تتصافوا بدل ما تصبوا احقادكم انتم وهم على راس هذا الشعب والوطن. .... وسلامتكم.. ...
اخوانكم أعضاء ومنتسبي حزب المؤتمر الشعبي العام
